Page:Scudéry - Artamène ou le Grand Cyrus, cinquième partie, 1654.djvu/652

les leurs. En ſuitte Cyrus ayant paſſé aupres d’Abradate, au lieu de luy parler comme aux autres, il luy dit ſeulement qu’il ſe preparoit à luy devoir une partie de la victoire qu’il eſperoit obtenir : mais comme le Roy de la Suſiane ne ſe trouvoit pas aſſez avantageuſement placé, il luy reſpondit qu’il voyait bien qu’il ne ferait tout au plus que luy aider à achever de vaincre, & qu’il avoit voulu que les Perſans luy enſeignaſſent à combatre. Apres quoy Cyrus continuant de marcher & d’exhorter ſes Soldats, il retourna à la teſte de l’Aiſle droite où il devoit combatre. A peine Cyrus eut il achevé de haranguer ſes Troupes, de leur donner ſes derniers ordres : & à peine eut il repris ſa place, qu’Araſpe qui s’eſtoit dégagé des Ennemis, & s’eſtoit jetté dans l’armée de Cyrus, vint ſe preſenter à luy. C’eſt icy Seigneur, luy dit il, que je viens expier la faute que j’ay faite, en mourant pour voſtre ſervice, comme je vous eſcrivis que j’en avois le deſſein, lors que je me jettay parmy vos Ennemis, afin de vous en mander des nouvelles Nous avons tant de beſoin de vaillants hommes, repliqua Cyrus, que tout criminel que vous eſtes, je ne laiſſe pas d’eſtre bien aiſe de vous voir, & de vous aſſigner voſtre place pour combatre aupres d’Andramite, quand vous m’aurez rendu conte en peu de mots de ce que vous sçavez des Ennemis. Alors Araſpe s’aprocha de l’oreille de Cyrus, & luy dit tout ce qu’il creut eſtre le plus important de luy apprendre : en ſuitte dequoy il s’alla mettre dans le petit Corps de Volontaires qui ſuivoit de fort prés la Perſonne de ce Prince. Mais à peine Cyrus eut il fait quelque reflexion ſur les advis qu’Araſpe luy venoit de donner, que l’on vit la Cavalerie Lydienne qui paroiſſoit ſur