Page:Scudéry - Artamène ou le Grand Cyrus, cinquième partie, 1654.djvu/646

Les ordres de Cyrus furent ſi bien executez, que cette retraitte ſe fit ſans confuſion, & ſans peril ; excepé la premiere Ligne de l’Aiſle droite où eſtoit Cyrus, parce que l’Aiſle gauche de Creſus qui luy eſtoit oppoſée, & ou eſtoient les Lydiens, & les Mariandins, eſtoit la plus dégagée, & celle qui pouvoit plus facilement venir fondre ſur ce Prince, parce qu’il y avoit moins d’obſtacles de ſon coſté que des autres : Auſſi fut-ce celle qui commença de quitter ſon Poſte pour aller charger un Prince que les Lydiens n’euſſent oſé attaquer de pied ferme, & qu’ils n’attaquoient que parce qu’il ſe retiroit. Cependant Cyrus avoit voulu que le corps de Cavalerie que commandoit Hidaſpe, fiſt ferme dans la plaine, afin que ſa ligne peuſt ſe retirer par les intervales de la Cavalerie, comme en effet elle le fit : mais les Troupes que commandoit Artabaſe ce jour là, qui faiſoient la retiraitte de toute l’Armée, auſſi bien que celles que commandoit Anaxaris, furent attaquées par les Mariandins, de qui ils ſouſtinrent l’effort avec beaucoup de courage, principalement Anaxaris, qui fit des miracles en cette occaſion. Mais quoy qu’ils peuſſent faire, les Troupes qu’ils commandoient pliererit ; Anaxaris fut bleſſé & fait priſonnier, & Artabaſe plus heureux que luy ſe dégagea d’eux, & rejoignit ceux de ſon Party. Les Ennemis voyant un commencement ſi heureux, euſſent pouſſé leur victoire plus avant, ſi Hidaſpe ne les euſt arreſtez, & ne les euſt repouſſez ſi vigoureuſement, qu’il en merita des acclamations, & des loüanges, de toutes les deux Armées qui le virent aller à la charge avec une ardeur qui faiſoit aſſez connoiſtre, qu’il eſtoit digne de l’amitié que Cyrus avoit pour luy. Hidaſpe combatant donc & pour ſa