Page:Scudéry - Artamène ou le Grand Cyrus, cinquième partie, 1654.djvu/641

de priere que pour tous les Perſes en general, excepté pour le Roy, ils demanderent à ces Divinitez, tout ce qui pouvoit eſtre glorieux à leur Nation : & par conſequent la victoire. En ſuitte ils prierent pour toute l’Armée, & pour Ciaxare ſeul en particulier : Cyrus n’ayant pas voulu qu’on le diſtinguaſt de tous les autres Perſans. Apres cela, les victimes eſtant immolées, on les eſtendit ſur des faiſſeaux de Mirte, & de Laurier, où l’on viſita les entrailles, qui ſe trouverent eſtre telles qu’il les faloit pour bien eſperer de la Victoire, & pour donner un nouveau cœur à tous les Soldats. Cependant quelque diligent que fuſt ce Prince à ſacrifier, il avoit eſté devancé par Creſus : il eſt vray que ç’avoit eſté d’une maniere bien differente, car comme luy & le Roy de Pont, auſſi bien que le Prince de Myſie, & tous les autres Chefs, avoient remarqué que leurs Soldats craignoient leurs Ennemis, & que le nom de Cyrus leur eſtoit extraordinairement redoutable, ils eurent peur eux meſmes que cette terreur ne miſt le deſordre dans leur Armée : de ſorte que comme il s’agiſſoit de donner une Bataille, qui ſembloit devoir eſtre une Bataille deciſive, ils s’aviſerent pour obliger leurs Soldats à faire leur devoir, & à joindre l’opiniaſtreté, à leur valeur ordinaire, de les y engager par un ſentiment de Religion. Pour cét effet, ils remirent en uſage un ancien Sacrifice dont on ſe ſervoit à la guerre, du temps que les Heraclides regnoient en Lydie. Ils firent donc dreſſer des Autels au milieu du Camp, où toute l’Armée ſe rangea comme en Bataille, environ à deux heures apres minuit. En ſuitte dequoy on alluma à l’entour de ces Autels douze feux, qui firent voir grand nombre de victimes, que les Sacrificateurs avoient deſja égorgées. A l’