Page:Scudéry - Artamène ou le Grand Cyrus, cinquième partie, 1654.djvu/630

que le temps qu’elle devoit durer ne fuſt entierement expiré : mais auſſi ne le fut il pas pluſtoſt, & les negociateurs de part & d’autre ne ſe furent pluſtoſt retirez, que Cyrus fit recommencer la guerre : & commença de faire filer toutes ſes Troupes, pour leur faire paſſer la Riviere d’Helle, au paſſage que tenoit le Frere d’Andramite : Et comme il y avoit en ce lieu là, un Grand & magnifique Chaſteau, auſſi toſt que l’Armée eut paſſé la Riviere, & que l’Avantgarde de Cyrus eut pouſſé les Coureurs de celle de Creſus, juſques à une demy journée de Sardis ; Cyrus fit amener la Reine de la Suſiane, la Princeſſe Araminte, & toutes les autres Dames priſonnieres dans ce Chaſteau, afin qu’Abradate ne fuſt pas obligé de repaſſer la Riviere, quand il voudroit aller voit Panthée. Cependant ce grand & merveilleux eſprit : qui eſtoit capable de tant de choſes à la fois, au milieu de tomes ſes ſouffrances amoureuſes, ne laiſſoit pas d’avoir toute la vigilance d’un jeune ambitieux, & toute la prudence d’un vieux Capitaine. Il sçavoit non ſeulement combien il avoit de Troupes ; de munitions, & de Machines : mais il sçavoit encore preciſément, quelles eſtoient les Troupes à qui il ſe devoit confier en une expedition dangereuſe ; il sçavoit la capacité des Capitaines ; & juſques où pouvoit aller la valeur de leurs Soldats : de ſorte que lors qu’il rangeoit ſon Armée, on eſtoit aſſuré que chacun eſtoit à la place qu’il devoit le mieux occuper. Mais durant qu’il ſongeoit à donner ordre à toutes choſes, tout le monde murmuroit fort dans l’Armée de Cyrus, de sçavoir qu’Araſpe eſtoit dans celle des Ennemis : on sçeut meſme un jour que les Rois de Phrigie, & d’Hircanie, Tigrane, Mazare, & beaucoup