Page:Scudéry - Artamène ou le Grand Cyrus, cinquième partie, 1654.djvu/563

changé ton humeur pour luy : tu n’eſtois plus ny fiere ny inégale : & touteſfois il te quitte, & te quitte lors que tu luy eſtois la plus favorable. Il faloit ſans doute, reprenoit elle, le traitter comme on traitte certains Eſclaves, qui ne ſervent bien que lors qu’on les traite mal : où pour mieux dire encore, il ne faloit avoir ny bonté ny rigueur pour luy : car pour noſtre repos, il faloir ne le voir du tour. Mais il n’eſt plus temps de raiſonner là deſſus, puis qu’il n’eſt que trop vray que je l’ay veû ; que je l’ay eſtimé ; & que je l’ay aimé : du moins, adjouſtoit elle, sçay-je bien que je ne le verray plus qu’une fois en particulier, pour luy reprocher ſon infidelité : & je sçay bien encore que je ne l’eſtime plus. Mais apres tout, pourſuivit elle en ſoupirant, je ne sçay pas ſi je ne l’aime plus : il me ſemble que j’ay plus de douleur & de colere que de haine : & que j’ay quelque peine à m’empeſcher de ſouhaiter qu’il ſe repente, le ſuis pourtant reſoluë, quand meſme il ſe repentiroit, de ne luy pardonner jamais : & de me vanger ſur luy, & de ſon propre crime, & de ma foibleſſe. Apres cela Cleodore m’a raconté qu’elle dit encore cent choſes, dont elle ne ſe ſouvenoit pas meſme preciſément : qu’elle forma cent reſolutions contraires les unes aux autres : & que tout ce quel amour, la haine, la colere, & la jalouſie peuvent inſpirer de plus violent, luy paſſa dant l’eſprit. Elle fut meſme ſi long temps à s’entretenir, que ſes Femmes furent contraintes de l’advertir qu’il eſtoit extraordinairement tard : & que ſi elle vouloit dormir devant qu’il fuſt jour, il faloit qu’elle ſe couchaſt bientoſt. Cleodore voulant donc cacher ſes chagrins, reprit le Portrait qu’elle avoit jetté ſur ſa Table avec tant de violence ; & ſe fut mettre