de la Compagnie, auſſi toſt que les premiers Complimens furent faits. Cependant Leoniſe qui avoit veû entrer Beleſis, tournoit continuellement la teſte pour regarder s’il parloit à Cleodore : mais comme elle vit qu’ils ne ſe diſoient preſques rien, & qu’ils venoient où elle eſtoit, le dépit qu’elle avoit eu en diminua. Elle ne laiſſa pourtant pas de s’en vouloir vanger, comme elle le fit un moment apres : car Seigneur, vous sçaurez que Beleſis qui en entrant dans cette Chambre avoit pluſtoſt choiſi d’aller vers Cleodore que vers Leoniſe, parce qu’elle eſtoit ſeule avec Hermogene ; ne vit pas pluſtoſt qu’ils eſtoient ſeparez, & meſlez dans le reſte de la Compagnie, qu’il ſe mit aupres de Leoniſe, qui pour ſe vanger, comme l’ay deſja dit, le reçeut avec une froideur qui ne le conſola pas de tous ſes deſplalſirs ſecrets. Car ſe tournant un moment apres vers Tiſias, qui eſtoit de l’autre coſté, afin d’aprendre à Beleſis par ſon experience, quel dépit eſt celuy de voir preferer un autre à ſoy ; il ne pût l’obliger à luy parler de tout le reſte du jour.
Mais pendant que Leoniſe ſe vangeoit de cette ſorte, Cleodore qui avoit une impatience eſtrange de s’eſclaircir abſolument de ce qu’Hermogene luy avoit dit, fit ſi bien que ſans que perſonne pûſt prendre garde qu’elle euſt affecté la choſe, elle fit que toute la Compagnie prit la reſolution de s’aller promener au bord du Fleuve qui paſſe à Suſe : Cleodore n’ayant pas voulu aller à la promenade ordinaire, parce qu’elle n’auroit pas eu la liberté de parler à Beleſis comme elle le vouloit. Comme Tiſias eſtoit aupres de Leoniſe ; & qu’il eſtoit d’une condition ſi conſiderable dans Suſe ; que perſonne ne luy pouvoit diſputer la place qu’il vouloit prendre, ce fut luy qui mit Leoniſe dans le Chariot, où
