comme elle eſtoit glorieuſe quoy qu’elle fuſt douce, elle ſe reſolut de vivre plus froidement aveque luy : comme le voulant punir de ce qu’il eſtoit cauſe qu’elle avoit eu cette converſation avec Praſille, qui ne luy avoit pas eſté agreable. Il vous eſt aiſe de juger, apres ce que je viens de dire, que ces quatre Perſonnes ne furent pas ſans occupation : car Cleodore faiſoit ce qu’elle pouvoit pour contraindre ſon humeur, & pour deſcouvrir d’où venoit le chagrin de Beleſis : & Beleſis de ſon coſté, avoit bien aſſez d’affaire à continuer de tromper Cleodore, & à taſcher de trouver les voyes de deſcouvrir ſon amour à Leoniſe. Hermogene s’eſtant reſolu à feindre d’eſtre amoureux, n’eſtoit pas auſſi ſans ſoin : & Leoniſe voulant deſcouvrir preciſément les ſentimens de Beleſis, avoit une eſpece de curioſité inquiette, que l’on pouvoit peut-eſtre nommer autrement. D’abord qu’Hermogene commença d’aller plus ſouvent chez Cleodore, elle luy fit cent carreſſes ; luy ſemblant que c’eſtoit obliger Beleſis, que d’obliger Hermogene : & croyant meſme qu’il n’y venoit que pour rendre office à ſon Amy : quoy qu’elle n’imaginaſt pourtant pas la choſe comme elle eſtoit, & qu’elle en fuſt bien eſloignée.
Quelques jours ſe paſſerent donc de cette ſorte, ſans que toutes ces perſonnes euſſent nul ſujet d’augmentation d’inquietude : il eſt vray que pour Beleſis il en avoit tant, qu’il n’euſt pas eſté aiſé qu’il en euſt eu davantage : car lors qu’il eſtoit ſeul avec Cleodore, il ne pouvoit plus que luy dire : & quand il eſtoit avec Leoniſe & avec elle, il eſtoit ſi interdit & ſi confondu, qu’il ne trouvoit pas non plus dequoy fournir à la converſation, ſi ce n’eſtoit de choſes indifferentes. Cependant Hermogene pour
