En ſuitte dequoy, s’eſtant retirez dans une autre Chambre, & n’eſtant démeuré que la Reine de la Suſiane ; la Princeſſe Araminte ; Cyrus ; Abradate ; & Mazare ; Alcenor commença le recit qu’il devoit faire en ces termes : Panthée luy ayant ordonné d’adreſſer touſjours la parole à Cyrus comme devant eſtre l’Arbitre de ce different : joint qu’elle eſtoit deſja aſſez informée de cette avanture : quoy qu’elle fuſt bien aiſe de l’entendre encore une fois.
HISTOIRE DE BELESIS, D’HERMOGENE, DE CLEODORE, ET DE LEONISE.
Il vous doit ſans doute ſembler eſtrange, Seigneur, que je ſois ſi également Amy dés deux Ennemis, dont vous voulez terminer les differents, que je sçache juſques aux moindres evenements de leur vie, & juſques à leurs penſées les plus ſecrettes : & qu’ils ayent cous deux ſi bonne opinion de ma ſincerité, qu’ils conſentent que je vous aprenne leurs avantures hors de leurs preſence,
