Page:Scudéry - Artamène ou le Grand Cyrus, cinquième partie, 1654.djvu/420

autres, eſtoit qu’il avoit cent mille Amis en Lydie : & qu’ainſi ce qui le devoit rendre plus heureux, eſtoit ce qui le rendoit plus miſerable. De ſorte qu’il falut ſe contenter de ſonger à la liberté du Roy d’Aſſirie, & à celle de Soſicle, de Tegée, de Feraulas, & d’un Eſtranger apellé Anaxaris, Comme celuy qui commandoit les Soldats qui les gardoient, eſtoit Amy particulier de Tegée, quoy que Creſus ne le sçeuſt pas, il nous fut aiſé d’executer la choſe : ainſi des la nuit prochaine, environ deux heures devant le jour, le Prince Mazare, Andramite, Beleſis, quelques autres de leurs Amis, & moy, fuſmes trouver ce Capitaine qui nous attendoit : & ſuivant ce que nous eſtions convenus enſemble, il nous mena droit à la Chambre du Roy d’Aſſirie, qui s’eſtant eſveillé au bruit que l’on avoit fait en y entrant, fut eſtrangement ſurpris, de voir à la faveur d’une Lampe magnifique qui eſtoit penduë au milieu de ſa Chambre, que c’eſtoit le Prince Mazare qu’il croyoit mort, qui s’aprochoit de luy. Comme ce Prince eſt d’un naturel violent, quoy qu’il ne sçeuſt pas trop bien s’il eſtoit eſveillé ou endormy ; ſi ce qu’il voyoit eſtoit un Phantoſme ou un Homme : il s’aſſit ſur ſon lict : & trouſſant de la main droite un grand Pavillon de Pourpre de Tir qui le couvroit, que voy-je, luy dit il d’un ton de voix fier & eſlevé, ſortez vous d’entre les Ombres des Morts, pour m’annoncer la fin de ma vie ; ou eſtes vous encore entre les vivants, pour me donner lieu de vous punir de voſtre trahiſon ? Seigneur (repliqua le Prince mon Maiſtre ſans s’émouvoir) vous sçaurez tout à loiſir d’ou je ſorts, quand vous ſerez ſorty de la priſon où vous eſtes, & d’où je viens vous tirer : afin de reparer ſi je puis, la faute que je commis contre