des ſervices que je vous ay voulu rendre : & comme le ſeul remede aux maux que je ſouffre. Apres cela, Madame ma memoire vous ſera t’elle encore en horreur, & haïrez vous Mazare & vivant, & mort ? Pendant que ce Prince parloit ainſi, la Princeſſe le regardoit attentivement : & il y eut des inſtants, où j’eſperay qu’elle ſe laiſſeroit perſuader : mais il n’y eut pourtant pas moyen. Elle luy parla touteſfois avec plus de douceur, depuis ce qu’il luy eut dit de l’illuſtre Cyrus : & je ne sçay ſi cette converſation euſt duré un peu plus long temps, ſi à la fin cette vertueuſe Princeſſe n’euſt pas connu la verité.
Mais ce Capitaine qui nous avoit fait entrer, nous eſtant venu advertir qu’il eſtoit temps de ſortir de l’Apartement de la Princeſſe, & de retourner au ſien, juſques à ce qu’il nous puſt faire ſortir de la Citadelle, il falut en effet nous retirer, ſans avoir pû perſuader la Princeſſe Mandane : & avec le déplaiſir d’avoir amené inutilement une ſi grande & ſi hardie entrepriſe, ſi prés d’eſtre executée. Auſſi vous puis-je aſſurer, que mon Maiſtre en eut une douleur extréme : & quand je me ſouviens quel tranſport fut le ſien, lors qu’apres que nous fuſmes ſortis de la Citadelle il raconta à Beleſis ce qui luy venoit d’arriver ; je ne puis que je n’admire encore la grandeur de ſa paſſion, par la grandeur de ſon deſespoir. Car enfin il vouloit mourir abſolument : & ne pouvoit pas comprendre, ny qu’il pûſt vivre ny qu’il le deuſt : de ſorte que Beleſis & moy n’euſmes pas peu de peine, à moderer la fureur qu’il avoit contre luy meſme. Ce que j’admiray le plus. fut que la veuë de Mandane ne fit qu’augmenter ſon repentir, & que le confirmer dans le genereux deſſein qu’il avoit : les Gardes de cette Princeſſe ; ſon logement ; &
