Page:Scudéry - Artamène ou le Grand Cyrus, cinquième partie, 1654.djvu/325

rendre un autre office, ſans lequel le premier qu’il luy avoit rendu demeureroit inutile. Mais afin que ſa priere ne la fuſt pas, il luy donna une grande Medaille d’or, pendue à une chaine de meſme metal, que la Reine Nitocris luy avoit autrefois donnée à Babilone, quand il y accompagna le Prince ſon Maiſtre. La veuë d’un preſent qui parut ſi riche aux yeux d’un pauvre Peſcheur, fit que cét homme luy promit abſolument de faire tout ce qu’il voudroit, quand meſme il faudroit hazarder ſa vie pour le ſervir : de ſorte que Tiburte ſans perdre temps, fit porter la nuit prochaine le Prince Mazare dans la Barque qu’il fit couvrir, de peur qu’en l’eſtat où il eſtoit le grand air ne luy fiſt mal. Le Prince Mazare fit d’abord quelque difficulté de conſentir à ce que Tiburte ſouhaitoit : ne voulant point, diſoit il, abandonner le Rivage où la Princeſſe Mandane avoit pery, & aimant mieux mourir en ce lieu là qu’en un autre : mais Tiburte luy ayant promis qu’il ne l’en eſloigneroit pas beaucoup ; que ce ne ſeroit meſme que juſques à ce que l’on euſt sçeu ſi l’on n’avoit point eu de nouvelles de la Princeſſe qu’il regrettoit ; & qu’il ne l’obligeoit à en partir, que parce qu’il ſeroit tres facheux qu’il tombaſt entre les mains de Ciaxare ; il commença de ceder à ſa volonté. Ce ne fut touteſfois pas tout d’un coup ; car Tiburte, luy diſoit il, puis que je ne cherche qu’à mourir, que m’importe que le Roy des Medes ou Artamene me donnent la mort ? s’il n’importe pas pour vous, luy dit Tiburte, il m’importe du moins pour le Roy voſtre Pere, & pour la Reine voſtre Mere : & il importe meſme à, tous les Peuples ſur leſquels vous eſtes deſtiné à regner. C’eſt pourquoy ne me reſistez pas s’il vous plaiſt : & laiſſez