le portant à l’aſſister, il ſe remit dans ſa Barque, & fut au devant de cét homme, apellé Tiburte. Grec de Nation, & qui eſtoit aupres du Prince Mazare, pour luy aprendre les ſciences proportionnées à ſa qualité. A peine fut il aupres de luy, que luy tendant la main il le fit monter dans ſa Barque : où il ne fut pas plus toſt, qu’il penſa s’eſvanouïr, tant il le trouva foible. Touteſfois eſtant revenu, il luy aprit comment il avoit fait naufrage, ſans luy dire que ç’euſt eſté en enlevant la Princeſſe Mandane : de peur de luy oſter une partie de l’ardeur qu’il avoit à le ſervir. De ſorte que ce Peſcheur le conſolant à ſa mode, luy offrit ſa Cabane pour retraite, ce que Tiburte accepta : afin de taſcher d’aprendre le long du rivage, s’il ne ſeroit eſchapé que luy, de tant de perſonnes qui eſtoient dans la Galere où il avoit fait naufrage, & ſi ſon Maiſtre avoit pery comme les autres. Ce Peſcheur reprenant donc ſa route, quand la mer fut tout à fait apaiſée, il commença de ramer : mais comme il avoit perdu uné de ſes rames, il fut longtemps à regagner le bord : & ſi longtemps enfin, qu’il n’arriva à ſa Cabane, qu’une heure apres que l’illuſtre Artamene en fut ſorty. je vous laiſſe à penſer Madame, quelle ſurprise fut celle de Tiburte, de voir le Prince Mazare comme il le vit : car il n’eſtoit pas encore revenu de l’eſvanouïſſement où l’illuſtre Artamene l’avoit laiſſé. D’abord qu’il l’aperçeut, il en eut de la joye : mais ayant conſideré le pitoyable eſtat où il le voyoit, il s’en afligea extrémement. Cependant comme cét homme eſt univerſellement sçavant en toutes choſes, & que la Medecine meſme ne luy eſt pas entierement inconnuë, il commença de taſcher de s’eſclaircir ſi ce Prince eſtoit encore vivant, & s’
Page:Scudéry - Artamène ou le Grand Cyrus, cinquième partie, 1654.djvu/323
Cette page n’a pas encore été corrigée
