Page:Scudéry - Artamène ou le Grand Cyrus, cinquième partie, 1654.djvu/275

beaucoup mieux ſon Eſcu, qu’il vit eſtre le meſme qu’on luy avoit aſſuré que Telephane portoit touſjours. De ſorte qu’impatient qu’il eſtoit qu’il détournaſt la teſte, il eſcouta Abradate ſans le regarder : & par un ſentiment dont il ignoroit la cauſe, il ſentit dans ſon ame une eſmotion extraordinaire. Elle augmenta bien encore davantage, lors que ce pretendu Telephane ſe retournant, il vit que c’eſtoit le Prince Mazare ou ſon Phantôme : car comme il avoit veû ce Prince pluſieurs fois à Babilone, devant que de l’avoir veû mourant aupres de Sinope ; & que l’idee d’un Rival ne s’efface jamais de la memoire, il le reconnut d’abord. Neantmoins comme il avoit creû avec certitude qu’il ne vivoit plus, cette veuë le ſurprit d’une telle ſorte, qu’il ne pût s’empeſcher d’interrompre Abradate : & de grace (luy dit il en montrant celuy dont il vouloit parler) depuis quand ce Cavalier eſt il parmy vous ; & pourquoy ſe fait il nommer Telephane ? le Roy de Pont prenant la parole, bien aiſe d’eſperer de pouvoir sçavoir qui eſtoit un homme qui avoit deſja fait de ſi belles actions, depuis qu’il eſtoit en Lydie ; luy dit qu’il eſtoit arrivé à Sardis, quelque temps auparavant que la Princeſſe Mandane y fuſt : mais que pour le nom qu’il portoit, il ne sçavoit pas ſi c’eſtoit le ſien. Non non, luy dit Cyrus, ſi mes yeux ne me trompent, Telephane n’eſt pas Telephane : mais ouy bien le Prince Mazare, un des Raviſſeurs de ma Princeſſe, que les Dieux auront ſans doute reſſuscité, pour me tourmenter davantage. Mazare s’entendant nommer par Cyrus (car c’eſtoit effectivement luy) s’avança juſques au bord du Ruiſſeau : & le regardant avec plus de melancolie que de fierté ; puis que vous avez deſcouvert mon veritable nom, luy dit il, je ne le veux pas