vray, eſt que ſans luy cette petite Ville euſt pû tenir plus de huit jours : toutefois par ſon incomparable valeur, il la prit en vintquatre heures, ſans y avoir meſme perdu que tres peu de gens : plus de la moitie de la garniſon ayant eſté taillée en pieces, & le reſte ayant pris party dans l’Armée de Cyrus. Ainſi le Roy de Lydie perdit en meſme temps, un paſſage tres conſiderable ſur la Riviere d’Hermes, & trois mille de ſes meilleurs Soldats. Ce premier ſuccés donna tant de joye à toute l’Armée de Cyrus, & porta tant de terreur dans tout le Pais qui eſt le long de la Riviere d’Hermes, que l’on euſt dit que ce Conquerant eſtoit deſja Vainqueur de toute la Lydie.
Cependant apres avoir reparé quelque deſordre qui s’eſtoit fait en prenant cette Ville, & y avoir mis garniſon, Cyrus fit paſſer toutes ſes Troupes ſur le Pont de Nyſomolis : de ſorte qu’en un jour & demy, toute cette grande Armée inonda, s’il faut ainſi dire, toute la Campagne voiſine : portant avec elle une terreur ſi eſpouventable, que depuis les bords de la Riviere d’Hermes, juſques à ceux du Pactole, il n’y eut perſonne qui n’en tremblaſt, & que la peur ne ſaisist. L’Armée meſme de Creſus en fut eſtonnee : neantmoins comme elle eſtoit beaucoup plus nombreuſe que celle de Cyrus, elle ſe raſſura bien toſt : mais comme il y avoit encore quelques Troupes qui n’eſtoient pas arrivées, Creſus ne voulut pas ſi toſt deſcamper : joint qu’il creut qu’il eſtoit à propos de laiſſer un peu allentir la ſurie de ce Torrent, qui faiſoit un ſi grand bruit : croyant en effet que l’Armée de Cyrus ſe diſſiperoit durant que la ſienne ſe groſſiroit encore. Il envoya pourtant vint mille hommes, ſous la conduite d’Andramite, pour arreſter un peu les Coureurs de l’Armée de Cyrus,
