la reputation d’estre doux et gracieux ne sert de beaucoup. Mais ce fut clemence quand, aprés avoir vaincu Pompée et deffaict tout ce qui luy pouvoit resister, il vint à Rome sans triomphe et pardonna à tous ses capitaux ennemis, les remettant tous en leurs biens honneurs et dignitez. Dequoy toutefois trés mal luy prit, car ceux à qui il avoit pardonné, et faict plus de gracieuseté, furent ceux qui le trahirent et massacrerent miserablement. Il y a donc difference entre clemence et douceur : la douceur tombe ordinairement aux femmes et aux hommes de petit courage ; mais la clemence n’est qu’en celuy qui est maistre absolu, et qui faict du bien quand il peut faire tout mal. Concluons donq que nostre Roy devoit reserver à user de sa clemence quand il nous auroit tous en sa puissance. C’est inclemence, voire cruauté, dit Ciceron, de pardonner à ceux qui meritent mourir, et jamais les guerres civiles ne prendront fin si nous voulons continuer à estre gracieux où la severité de justice est necessaire. La malice des rebelles s’opiniastre et s’endurcit par la douceur dont on use envers eux, parce qu’ils pensent qu’on n’ose les irriter ni les mettre à pis faire. Je ne fay doute, s’il eust chastié chaudement tous ceux qui sont tombez entre ses mains depuis ces troubles, que ne fussions à present tous soubs son obeissance.
Page:Satyre menippee garnier freres 1882.djvu/329
Cette page n’a pas encore été corrigée
