Page:Satyre menippee garnier freres 1882.djvu/322

n’y a ni raison, ni apparence de raison en tout cela. Il y a long-temps que l’axiome est arresté, que les papes n’ont aucun pouvoir de juger des royaumes temporels. Et y a long-temps que Sainct-Bernard a dict : Stetisse quidem judicandos Apostolos lego, sedisse judicantes nunquam lego : les Apostres ont souvent comparu tout debout devant les juges pour estre jugez, mais jamais ne se sont sis en chaire pour juger. Aussy sçavons-nous bien que beaucoup d’Empereurs Arriens, venants à l’Empire par sucession ou par adoption, n’ont pas esté rejettez ni repoussez de leurs peuples et subjects orthodoxes, ains ont été receus et admis en l’auctorïté Imperiale, sans tumulte ne sedition ; et les Chrestiens ont tousjours eu ceste maxime, comme une marque perpetuelle de leur religion, d’obeir aux Roys et Empereurs, tels qu’il plaisoit à Dieu leur donner, fussent-ils Arriens ou Payens ; se formans à l’exemple de Jesus-Christ, qui voulut obeir aux loix de l’Empereur Tibere, imitans Sainct-Paul et Sainct-Pierre, qui obeirent à Neron, et par exprez ont commandé en leurs Epistres d’obeir aux Roys et Princes, parce que toute puissance souveraine est de Dieu et represente l’image de Dieu. C’est bien loing de nos mutins, qui les chassent et les massacrent, et de vous, Monsieur le Légat, qui