Page:Satyre menippee garnier freres 1882.djvu/319

Vous n’avez rien, Messieurs, vous n’avez rien à présent, Monsieur le Lieutenant, que lui puissiez objecter. Le pretexte de l’oncle au nepveu vous est osté par la mort de Monsieur le Cardinal, son oncle. Je ne veux parler de luy, ni par flaterie, ni en mesdisance : l’un sent l’esclave, l’autre tient du seditieux ; mais je puis dire avec verité, comme vous-mesmes, et tous ceux qui hantent le monde ne nieront pas, que, de tous les Princes que la France nous monstre marquez à la Fleur de Lyz et qui touchent à la Couronne, voire de ceux qui desirent en approcher, il n’y en a point qui merite tant que luy, ni qui ayt tant de vertus royales, ni tant d’avantages sur le commun des hommes. Je ne veux pas dire les defauts des autres, mais s’ils estoient tous proposez sur le tableau de l’election, il se trouveroit de beaucoup le plus capable et le plus digne d’estre esleu. Une chose luy manque, que je diroy bien à l’oreille de quelqu’un, si je vouloy : je ne veux pas dire la religion differente de la nostre, que luy reprochez tant, car nous sçavons de bonne part que Dieu luy a touché le cœur, et veut estre enseigné, et desja s’accommode à l’instruction ; mesme a fait porter parole au Sainct Pere de sa prochaine conversion ; de quoy je fay estat comme si je l’avois desja veue, tant il s’est monstre tousjours respectueux en