leurre ! L’histoire des guerres civiles et de la revolte qui se fit contre le Roy Loys unzième est encore recente : le Duc de Berry, son frere, et quelques Princes de France, suscitez et encouragez par le Roy d’Angleterre, et encore plus par le Comte de Charolois, ne prindrent autre couleur de lever les armes que pour le bien et soulagement du peuple et du Royaume[1] ; mais enfin, quand il falut venir à composition, on ne traitta que de luy augmenter son appanage, et donner des offices et des appointements à tous ceux qui l’avoient assisté, sans faire mention du public non plus que du Turcq. Si vous prenez plus haut, aux Annales de France, vous verrez les factions de Bourgongne et d’Orleans avoir tousjours esté colorées du soulagement des tailles et du mauvais gouvernement des affaires ; et neantmoins l’intention des principaux chefs n’estoit que d’empieter l’authorité au Royaume, et advantager une maison sur l’autre, comme l’issue a tousjours faict foy : car enfin le Roy d’Angleterre emportoit tousjours quelque lippée pour sa part, et le Duc de Bourgongne ne s’en departoit jamais sans une ville ou une contrée, qu’il retenoit pour son butin. Quiconques voudra prendre loisir de lire ceste histoire y verra
- ↑ La guerre dite du Bien public, on 1465.
