Page:Satyre menippee garnier freres 1882.djvu/289

dommage, à vous gouverner d’ores en avant d’autre façon ; et ne vous laissez plus enchevestrer, comme avons faict, par les charmes et enchantements des prescheurs corrompus de l’argent et de l’esperance que leur donnent les princes, qui n’aspirent qu’à vous engager et rendre si foibles et si souples qu’ils puissent jouir de vous, et de vos biens, et do vostre liberté, à leur plaisir ! Car ce qu’ils vous font entendre de la religion n’est qu’un masque dont ils amusent les simples, comme les regnards amusent les pies de leurs longues queues, pour les attraper et manger à leur ayse. En vistes-vous jamais d’autres, de ceux qui ont aspiré à la domination tyannique sur le peuple, qui n’ayent tousjours pris quelque tiltre specieux de bien public ou de religion ? Et toutesfois, quand il a esté question de faire quelque accord, tousjours leur interest particulier a marché devant et ont laissé le bien du peuple en arriere, comme chose qui ne les touchoit point ; ou bien, s’ils ont esté victorieux, leur fin a tousjours esté de subjuguer et mastiner le peuple, duquel ils s’estoient aydez à parvenir au dessus de leurs desirs. Et m’esbahy, puisque toutes les histoires, tant anciennes que modernes, sont pleines de tels exemples, comment se trouve encore des hommes si pauvres d’entendement, de s’embattre et s’envoler à ce faux