n’y fistes pas grand cas, parce que vouliez temporiser en attendant à frapper vostre coup par deça, comme avez dit tantost. Mais les Heretiques de Sainc-tonge ne laisserent de s’en moquer, car, à vostre retour, ils firent une petite rime en leur patois, qui merite que la sachiez, et la voicy :
Haulsez voz voustes[1], grands portaux ! Huys de Paris, tenez-vous hauts ! Si entrera le Duc de Gloire, Qui, pour tuer cent Huguenaux A faict mourir mille Papaux : N’a-t-il pas bien gagné à boyre ?
Le quatrain qui en fut faict par deçà, est commun,
touchant les places que vous pristes :
Oronce est un oyson, et Thevet une cane[2], Qui, en représentant la carte Gallicane, Ont oublié de mettre, ou laissé par mépris, Les villes et chasteaux que ce grand Duc a pris !
Je ne parleray point de la belle prise que vous fistes du chasteau de Fronsac et d’une jeune dame qui estoit dedans, heritière de la maison de Caumont[3] ; cela ne merite pas d’estre recité en ceste