DE SANNAZAR. 16
mouillez. Mais il sembloit qu’en gestes & paroles elles se voulußêt mocquer de ces satyres qui ne les avoiêt sceu attaindre. A l’un des costez de ceste paincture estoit figuré Apollo, leql appuyé sus un bastõ d’olivier fauvage, le long d’une riviere gardoit les bestes d’Admetus. Et pour estre trop entêtif a regarder le cõbat de deux puissans Tureaux qui s’entreheurtoiêt de leurs cornes, il ne s’avisoit du cauteleux Mercure qui luy destournoit ses vaches, estant desguyse en habit de pasteur portãt une peau de chievre soubz son eselle. Mais tout ioignãt estoit Battus deceleur de ce larrecin, transformé en pierre, tenãt encores le doy estendu cõme qui enseigne quelque chose. Vn peu plus bas se pouoit veoir derechef ce mesme Mercure aßis cõtre une roche, ayãt les ioues enflees de sõner une chevrette, mais il guygnoit du coing de l’œuil une Genice blãche estãt pres de luy soubz la cõduicte d’Argus, qu’il s’efforcoit decevoir par toutes manieres de finesse.De l’autre part gisoit au pied d’un hestre un pasteur endormy au meillieu de ses chievres, sa pannetiere soubz sa teste, en laquelle un chien mettoit le museau. & pour autant que la Lune le contemploit de bon œuil, i’estimay que c’estoit Endymion. Aupres de luy estoit Paris, qui avec sa faucille avoit cõmencé d’escrire Oenoné sus l’escorce d’un Orme, mais il ne l’avoit encores sceu
