Le texte de cette page a été corrigé et est conforme au fac-similé.
En m’assurant, qu’encor qu’il soit mal faict,
Si sera il avec les tiens conjoinct:
Et ne fust ce, qu’estant avec eulx joinct,
Il leur pourra servir à donner lustre.
Ha, je dy mal, il ne leur en fault point,
Car ton sçavoir, ton Oeuvre assés illustre.
P. Tolet Médicin, aux Poetes
Françoys, du Livre
de S. Marthe.
Un fol plaisir Cupido vous donna,
Poetes Françoys, quand il vous enseigna,
En escrivant, suivre l’affection,
Qui un chascun meine à perdition.
Or (comme gents paravant oubliés)
Lisant ceste Oeuvre, ensemble reduisez,
Vos dicts, à ceulx lesquels à mal n'incitent:
Mais à honneur acquerir vous invitent.
Cest Oeuvre cy, vous monstre sans nul blasme,
L'immortel Bien, de vostre immortelle Ame.
Maurice Chausson,
A S. Marthe
D’Hebreu, de Grec, de Latin et Françoys,
Tu es garny, voire si grandement,
