Le texte de cette page a été corrigé et est conforme au fac-similé.
A P. Tolet, Medicin du grand
Hospital de Lyon,
Sur l'amitié de luy, et de Dolet
Vers Alexandrins.
Nature desirant, faire un couple d'Amys,
De perfecte Amytié, oeuvre en perfection:
En un mesme lieu ensemble vous a mis,
Faisant de vos deux Cueurs, en un conjunction.
Mesme temps, mesme lieu, mesme habitation,
Mesme meurs, mesme Esprit, et mesme Age, l'empare
Un cas tant seulement l'un de l'autre separe,
L'un grand en Medicine, et l'aultre en Eloquence.
Pour declairer en vous profession dispare,
Une lettre, à vos Noms a mis la différence.
A Loys de Saincte Marthe
son Frere.
Que Vertu n’est contaminée pour
detraction des meschants.
C'est grand thresor, que d'avoir bon renom
Encores plus, de bonne Conscience:
Car on pourrà denigrer nostre Nom
Par faulx rapport, plein de maledicence,
