Le texte de cette page a été corrigé et est conforme au fac-similé.
A P. de Marillac,
Comment on doibt prendre ce terme
Fortune.
Si nous usons de ce terme, Fortune,
Pource n'avons opinion errante:
Non que cuiddions estre Déesse aulcune,
Laquelle soit de ce monde regente.
Nous confessons, que dieu seul, nous regente:
Et droit vers luy prenons nostre recours:
Car nous sçavons Bien, et Mal, avoir cours,
Ainsi qu'il plaist à sa grande puissance.
Nous appellons Fortune, ce discours,
Usants du mot plus cogneu par usance.
Que amour ne pourroit estre deshonneste.
Amour n'est rien que bonne volunté,
Signifiante entiere affection,
Amour à Bien est toufjours apresté,
Amour aussi à ses fins arresté,
De pervenir à la perfection.
Amour prétend une conjunction
Indiuidue, et par ainsi honneste,
Or ne peut donq' estre Amour deshonneste.
