Page:Saint-Amant - Œuvres complètes, Livet, 1855, volume 1.djvu/450

On s’y massacre en cent façons,
Et tout y charge pesle-mesle.

Les hommes foulent les coursiers ;
Les coursiers sur les hommes passent,
Et de soldats et d’officiers
Maints corps dessus maints corps s’entassent.

La fureur, l’animosité,
L’orgueil, l’ire et la turbulence,
De l’un et de l’autre costé
Monstrent leur cruelle insolence.

L’enorme spectre du trespas
Y troubloit les uns et les autres ;
Mais la victoire aux doux appas,
Rioit pourtant aux yeux des nostres.

Et, quoy que l’assiette du lieu
À l’ennemy fust favorable,
Mon grand et noble demy-dieu
En fit un meurtre deplorable.

Ce fameux prince estoit par tout,
À droit, à gauche, en queue, en teste,
Et sa valeur, tousjours debout,
Portoit la foudre et la tempeste.

Un seul trait de ses yeux brillans
Mettoit l’adversaire en desordre,
Faisoit trembler les plus vaillans
Et ranimoit les siens à mordre.

Son aspect changeoit en vigueur
Leur haletante lassitude,
Et du laurier plein de rigueur
Son fer tranchoit l’incertitude.

Sa furieuse esmotion
Valoit à tous une harangue ;