desdaigne de passer par la loy, ains gayement et de bonne volonté s’y sousmettre, i’entends les personnes seculieres, et de mediocre condition, ausquelles seules on fait obseruer cette loy.
L’Isle d’Anticosty, où l’on tient qu’il y a des Ours blancs monstrueusement grands, et qui deuorent les hommes comme en Noruegue, longue d’enuiron 30. ou 40. lieues, nous estoit à main droicte, et en suite des terres plattes couvertes de Sapiniers, et autres petits bois, iusqu’à la rade de Tadoussac. Cette Isle, auec le Cap de Gaspé, opposite, font l’emboucheure de ce fleuue, que nous appelons de Sainct Laurent, admirable, en ce qu’il est vn des plus beaux fleuues du monde, comme m’ont aduoué dans le pays des personnes mesmes qui auoient faict le voyage des Molucques et Antipodes. Il a son entrée selon qu’on peut presumer et iuger, prés de 20. ou 25. lieuës de large, plus de 200. brasses de profondeur, et plus de 800. lieues de cognoissance ; et au bout de 44|| 400. lieuës elle est encore aussi large que les plus grands fleuues que nous ayons remarquez, remplie par endroicts d’Isles et de rochers innumerables ; et pour moy ie peux asseurer que l’endroict le plus estroict que i’ay veu, passe la largeur de 3. et 4. fois la riuiere de Seine, et ne pense point me tromper, et ce qui est plus admirable, quelques-vns tiennent que cette riuiere prend son origine de l’un des lacs qui se rencontrent au fil de son cours, si bien (la chose estant ainsi) qu’il faut qu’il y ait deux cours, l’vn en Orient vers la France, l’autre en Occident, vers la mer du Su, et me semble que le lac des Shequaneronons a de mesme deux descharges opposites, produisant une grande riuiere, qui se va rendre dans
