et gros à proportion, passer tout ioignant nostre nauire : on me dit que c’estoit un Requiem, poisson fort friand de chair humaine, c’est pourquoy qu’il ne fait pas bon se baigner où il y en a, pource qu’il ne manque pas d’engloutir les personnes qu’il peut attraper, ou du moins quelque membre du corps, qu’il coupe aysement auec ses deux ou trois rangées de dents qu’il a en sa gueule, et n’estoit qu’il luy convient tourner le ventre en haut ou de costé pour prendre sa proye, à cause que comme vn Esturgeon, il a sa gueule sous vn long museau, il devoreroit tout : mais il luy faut du temps à se tourner, et par ainsi il ne faict pas tout le mal qu’il feroit, s’il auoit sa gueule autrement.
Assez proche du Grand-Banc, vn de nos matelots herponna vne Dorade, c’est, à mon aduis, le plus beau poisson de toute la mer ; car il semble que la Nature se soit délectée et ait pris plaisir à l’embellir de ses diuerses et viues couleurs : de sorte mesme qu’il esblouit presque la veue 28|| des regardans, en se diuersifiant et changeant comme le Cameleon, et selon qu’il approche de sa mort il se diuersifie et se change en ses viues couleurs. Il n’auoit pas plus de trois pieds de longueur, et sa nageoire qu’il auoit dessus le dos luy prenoit depuis la teste iusqu’à la queuë, toute dorée et couuerte comme d’vn or tres-fin : comme aussi la queue, ses aislerons ou nageoires, sinon que parfois il paroissoit de petites taches de la couleur d’vn tres-fin azur, et d’autres de vermillon, puis comme d’vn argenté ; le reste du corps est tout doré, argenté, azuré, vermillonné, et de diuerses autres couleurs, il n’est pas gueres large sur le dos, ains estroict, et le ventre aussi ; mais il est haut et bien proportionné à
