plus de deux lieues loin, puis sort et tombe dans vne autre profonde concauité ou grand bassin, enuironné d’vn grand rocher, où il ne se voit rien qu’vne tres-espaisse escume, qui couure et cache l’eau au dessous. Et comme ie m’amusois à contempler et considerer toutes ces cheutes d’eau entrer de si grande impetuosité dans ces chaudieres, et en ressortir avec la mesme impetuosité, ie me donnay garde que tous ces rochers d’alentour, où ie me tenois, sembloient tous couuerts de petits limas de pierre, et n’en peux donner autre raison, sinon, que c’est, ou de la nature de la pierre mesme, ou que le poudrin de l’eau tombant là dessus peut auoir causé tous ces effects : c’est aussi en cet endroict où ie trouuay premierement des plantes d’vn Lys incarnat, qui n’auoient que deux fleurs sur chacune tige.
Enuiron vn quart de lieuë apres le saut de la Chaudiere, nous passasmes à main364||droicte deuant vn autre saut ou cheute d’eau admirable, d’vne riuiere qui vient du costé du Su, laquelle tombe d’vne telle impetuosité de vingt ou vingt-cinq brasses de haut dans la grande riuiere, sur laquelle nous estions, qu’elle faict deux arcades, qui ont de largeur pres de trois cens pas. Les ieunes hommes Sauuages se donnent quelquefois le plaisir de passer auec leurs Canots par derriere la plus large, et ne se mouillent que du poudrin que faict l’eau ; mais il me semble qu’ils font en cela vne grande folie, pour le danger qu’il y a assez eminent : et puis, à quel propos s’exposer sans profit dans vn suiet qui nous peut causer vn repentir et tirer sur nous la risée et la mocquerie de tous les autres ? Les Yroquois venoient ordinairement
