à doubler la poincte, et que le long de la riuiere iusques au saut, l’eau se sousleuoit, s’enfloit, tournoyoit et boüillonnoit par tout comme sur vn feu, puis des rapports et traisnées d’eau qui nous venoient à la rencontre vn fort long espace de temps et auec tant de vitesse, que si nous n’eussions esté habiles de nous en destourner auec la mesme promptitude, nous estions pour nous y perdre et submerger. Ie demanday à mes Sauuages d’où cela pouuoit procéder ; ils me respondirent que c’estoit vn œuure du Diable, ou le Diable mesme.
Approchans du saut, en vn tres-mauuais et dangereux endroict, nous receusmes dans nostre Canot des grands coups de vagues, et encor en danger de pis, si les Sauuages n’eussent esté stilez et habiles à la conduite et gouuernement d’iceluy : pour leur particulier ils se soucioient assez peu d’estre mouillez (car ils n’auoient point d’habit sur le dos qui les empeschast de dormir à sec) : mais pour moy cela m’estoit vn peu plus incommode, et crai-354||gnois fort pour nos liures particulierement.
Nous nous trouuasmes vn iour bien empeschez dans des grands bourbiers, et des profondes fanges et marests, ioignant vn petit lac, où il nous fallut marcher auec des peines nompareilles, et si subtilement et legerement, que nous pensions à toute heure enfoncer par dessus la teste au profond du lac, qui portoit en partie cette grande estenduë de terre noire et fangeuse : car en effet tout trembloit sous nous. De là nous allasmes prendre nostre giste en vne ance de terre, où desia s’estoient cabanez depuis quatre iours vn bon vieillard Huron, auec deux ieunes gar-
