tuns d’aller tuer le Tonnerre, qu’ils pensoient estre vn oyseau, nous demandans si les François en mangeoient, et s’il auoit bien de la graisse, et pourquoy il faisoit tant de bruit : mais le leur donnay à entendre (selon ma petite capacité) comme et en quoy ils se trompoient, et qu’ils ne deuoient penser si bassement des choses ; dequoy ils resterent fort contents et aduoüoient auec vn peu de honte leur trop grande simplicité et ignorance.
Les Sauuages, non plus que beaucoup de simples gens, ne s’estoient iamais imaginé que la terre fust ronde et suspendue, et que l’on voyageast à l’entour du monde, et qu’il y eust des Nations au dessous de nous, ny mesme que le Soleil fist son cours à l’entour : mais pensoient que la terre fust percée, et que le Soleil entroit par ce trou quand il se couchoit, et y demeuroit caché iusqu’au lendemain matin qu’il sortoit par l’autre extremité, et neantmoins ils comprenoient bien qu’il estoit plustost nuict en quelques pays, et plustost iour en d’autres : car vn Huron venant d’vn long voyage, nous dist en nostre Cabane, qu’il estoit desia nuict en la con-252||trée d’où il venoit, et neantmoins il estoit plein Esté aux Hurons, et pour lors enuiron les quatre ou cinq heures après midy seulement.
