Cette page a été validée par deux contributeurs.
84
LE MIRACLE DE THÉOPHILE.
Ainz est uns puis toz plains d’ordure.
Là irai-gié !
Bien me seront li dé changié
Quant por ce que j’aurai mengié
M’aura Diex issi estrangié
De sa meson ;
Et ci aura bone reson :
Si esbahiz ne fu mès hom
Com je sui, voir.
Or dit qu’il me fera r’avoir
Et ma richèce et mon avoir ;
Jà nus n’en porra riens savoir :
Je le ferai.
Diex m’a grevé, je l’ greverai ;
Jamès jor ne le servirai :
Je li ennui.
Riches serai se povres sui :
Se il me het je harrai lui.
Preingne ses erres
Ou il face movoir ses guerres :
Tout a en main et ciel et terres ;
Je li claim cuite
Se Salatins tout ce m’acuite
Qu’il m’a promis.
Ici parole Salatins au déable et dist :
Uns crestiens s’est sor moi mis
Et je m’en sui mult entremis,
Quar tu n’es pas mes anemis ;
Os-tu, Sathanz ?
Demain vendra se tu l’atans.
