que cil ki le voient sacent nostre signourie, et que je sui li plus grans rois de Gos et de Magos dusqu’en occident. Et sachiés que nus n’ose mentir en la chité mon signor saint Thumas, qui tantost ne muire de mal mort ; ne devant nous n’ose nus mentir, que s’il i mentoit et nous le séussions, nous le tiesmongnerions à faus et à desloial, ne jamais n’aroit hounour entre nous ; car li uns doit hounorer l’autre : ensi le coumande nostre Sire. N’aoutire ne péchiet de luxure n’ose nus faire entour nous de nule part ; car celui ki est pris en aoutire nous l’ardons sans demourance ; et pour çou establi Dieux mariage que cascuns euist sa feme en tel manière qu’il ne péchast en l’autre.
Apriès nous vous faissons asavoir que nous vissitons cescun an le cors monsigneur sant Daniiel, le bénéoit prophète ; et si menons avoec nous .x. mil chevaliers et .ij. mil abalestriers simples, et .c. castiaus fais sour olifans, en tel manière que .iiij. olifant portent .j. castiel ; et sachiés que nous alons en tel manière guerroiier pour çou que nous nos puisiens desfendre des sierpens et des hons, et des dragons ki ont .vij. tiestes sor .i. cors, et des autres males biestes ki sont ès désiers de Babilone, que il nous convient aler .xv. jours par le désiert avant ke nous truissions Babilone la déserte ; mais nous trouvons moult de venissons, si coume ciers, et pors rouges en manière de sanc, et unicornes ki sont boin à menghier ; et si a .i. oissiel ki a non féniçon, ki sont millour à mengier que autre char ; et de Babilone dusqu’en la fin des désiers a .lx. lieues en .i. tenant, que nous le savons bien par nostre gent ki là vont de .vij. ans en .vij. ans, et pour çou i envoions-nous nos houmes ; et bien saciés que l’ost ki va par le désiert n’a mestier de char ne de poisson, et ès dé-
