Page:Rutebeuf - Oeuvres complètes, recueillies par Jubinal, tome II, 1839.djvu/444

437

ADDITIONS.

Nus n’i set terme de sa vie,
Prince ne roi, ne connestable.

Reson i a meillor et graindre
Por qoi nous devrions refraindre
De metre à vin gaster entente,
Por l’amor celui qui sanz faindre
En la croiz se lessa destraindre,
Quar le vin son sanc représente.
Mainte gent en sera dolente
S’ele n’est de boivre plus lente ;
Si ne les en doit-l’en pas plaindre,
Quar je di, qui que m’en desmente,
Que bien est d’enfer en la sente
Qui en yvrece veut par maindre.

De toz les geus c’omme set fère,
Ne puet-il mains de porfit trère
Que de vin boivre par outrage.
Li geus doit bien à toz desplère
De qoi nus porfis ne repère
Fors honte et péchié et domage.
Par trop vin fole le plus sage
Et en a le cuer plus volage
A plus tost mesdire et mesfère ;
Cors et âme, menbre, héritage,
I pert sovent l’umain lingnage :
De tel geu se fet bon retraire.

Diex commande en .i. devin livre
Que nului de vin ne s’enyvre,
Quar en yvrèce maint luxure,
Et por ce li fist Diex escrivre
Que bien se gardaissent d’estre yvre
Cil qui entendent l’Escripture.
Le mal, le péchié et l’ordure
Qui vient d’yvrece par nature
N’enpren-je ore pas à descrivre ;