Là fist nostre Sire cel jour
Sainte Ysabel mult grant honor.
La dame mist l’âme el cors
Et à l’enfant qui estoit mors ;
Tout ensi furent visité
Et de la mort resusité.
La dame n’ot mal ne dolor
Par la vertu nostre Signor :
Ensi en cel jor lor avint.
Li sire à son hostel revint
A lie chière, à samblant bel,
Dieu loant et sainte Ysabel.
Ces miracles que dis avons
Par tesmoignages les savons
Des bones gens k’adont i furent,
Ki por vérité le connurent.
Escrites furent et séelées :
Au pape, as cardonaus portées ;
Et avoec porta-on sa vie
Kant ele fu canonisie,
Et nous l’avomes translatée.
Je vous requier, si vos agrée,
Que vos nous voilliés otroier
Ke Jésu-Christ voelliés proier
Ki sires est de tout le monde,
Que celui face net et monde
Ki a ceste istoire rimée
Et ensi dite et compassée,
Ke tels oevres face en sa vie
K’il en ait gloire deservie.
Que Diex eskieuce d’estre en duel
Frère Robert de Camblinnuel !
