Théophilius acommenie.
Luès droit qu’an la bouche li mit
Le précieux cors Jhésu-Crist,
Son vis si grant clarté rendit
Qu’ausi com souloil resplandit ;
Si cler devint, c’en est la some,
Face d’angre ot, ne mie d’ome.
Tuit cil qui cest miracle virent
Moult durement s’en esjoïrent,
Et mult forment s’en merveillièrent ;
Dieu et sa mère en mercièrent
Grant et petit communément.
Théophillus isnelement
Repériez est à sa chapele
Devant l’ymage à la pucele,
Où vit les .iij. avisions.
Mult fu en granz afflictions[1],
Mult geta lermes et sopirs
Com cil en cui li Sains-Espirs
Aombrez ert et descenduz.
En crois se git tout estanduz
Devant l’ymage Nostre-Dame.
« Dame, fet-il, ma lasse d’âme
En ta garde met et commant.
Doce Dame, par ton commant
Ton douz Filz prie sanz délaie
Que tost à bone fin me traie.
Puisqu’il est tant miséricors
Qu’il a soufert que sons seint cors
Ai recéu, quel que je soie,
Dedenz mon cuer en ai tel joie
N’est riens el mont que je covoit
Fors tant que bone fin m’envoit. »
La douce Dame glorieuse
La douce Virge[2], la piteuse,
Son péchéor n’oblia pas :
Son finement et son trespas
Qu’il désiroit tant durement
Page:Rutebeuf - Oeuvres complètes, recueillies par Jubinal, tome II, 1839.djvu/324
Le texte de cette page a été corrigé et est conforme au fac-similé.
317
ET ÉCLAIRCISSEMENTS.
