Page:Rutebeuf - Oeuvres complètes, recueillies par Jubinal, tome II, 1839.djvu/323

316

NOTES

Douce Virge, douce pucele,
Com tu es douce, sade et bele !
Sour toutes riens es gracieuse,
Sour toutes riens es déliteuse,
Sour toutes riens es bele et sage,
Sor toutes riens as douz courage,
Sour toutes riens es debonère.
Dame, nus ne porroit retrère
Com par est doce et grant t’aïe.
Douce pucele, Verge pie,
Dame sans venin et sans fiel,
De toutes les vertuz du ciel
Hui en ces jor loée soies
De ce que tu à bones voies
Cest péchéor nos a remis
Et retolu as ennemis.
Douce Dame, douce pucele,
Dame sor toutes biautez bele,
Dame sor totes clartés clère,
Prie ton Fil, prie ton Père,
Qui tout le mont a en sa main,
Que tous nos gart et soir et main,
Et tieux œvres fère nos face
Par sa douçor et par sa grâce,
Que partir puissons à sa gloire.
Amen, dient cler et provoire. »

Quant li évesques par dit ot
Ce qu’il lui sist et que lui plot,
Téophillus sans demorée,
Qui la face ot mult esplorée,
A fet drecier et relever.
Pour l’anemi fère crever,
Et pour honir lui et sa guile,
Voiant le commun de la vile
Fet l’évesques la chartre prendre
Et si la fet ardoir en cendre.
Quant ele fu broïe et arse
Et la cendre par tot esparse,
Mult fu Nostre-Dame aorée,
Et mainte lerme i ot plorée.
Assez plorèrent clerc et lai ;
Et l’évesques sans nul délai,
Quant ot la messe défenie,