Cette page n’a pas encore été corrigée
XXXVII
Voicy le mois d’Avril, où nasquit la merveille
Qui fait en terre foy de la beauté des Cieux,
Le mirouer de vertu, le Soleil de mes yeux,
Seule Phénix d’honneur, qui les âmes resveille.
Les Œillets et les Liz et la Rose vermeille
Servirent de berceau : la Nature et les Dieux
La regardèrent naistre, et d’un soin curieux
Amour enfant comme elle alaicta sa pareille.
Les Muses, Apollon et les Grâces estoient
Tout alentour du lict, qui à l’envy jettoient
Des fleurs sur l’Angelette. Ah ! ce mois me convie
D’eslever un autel, et suppliant Amour
Sanctifier d’Avril le neufiesme jour,
Qui m’est cent fois plus cher que celuy de ma vie.
