Page:Ronsard - Sonnets pour Hélène - 1921.djvu/199

Cette page n’a pas encore été corrigée

LXXII

Afin que ton renom s’estende par la plaine
Autant qu’il monte au Ciel engravé dans un Pin,
Invoquant tous les Dieux, et respandant du vin.
Je consacre à ton nom ceste belle Fontaine.
 
Pasteurs, que vos troupeaux frisez de blanche laine
Ne paissent à ces bords : y fleurisse le Thin,
Et tant de belles fleurs qui s’ouvrent au matin,
Et soit dite à jamais la Fontaine d’Helene.

Le passant en Esté s’y puisse reposer,
Et assis dessus l’herbe à l’ombre composer
Mille chansons d’Helene, et de moy luy souvienne.

Quiconques en boira, qu’amoureux il devienne :
Et puisse en la humant, une flame puiser
Aussi chaude qu’au cœur je sens chaude la mienne.