Cette page n’a pas encore été corrigée
LVII
Seule sans compagnie en une grande salle
Tu logeois l’autre jour pleine de majesté,
Cœur vrayment généreux, dont la brave beauté
Sans pareille ne treuve une autre qui l’egalle.
Ainsi seul en son Ciel le Soleil se devalle,
Sans autre compagnon en son char emporté :
Ainsi loin de ses Dieux en son Palais voûté
Jupiter a choisi sa demeure royale.
Une ame vertueuse a tousjours un bon cœur :
Le Lièvre fuyt tousjours, la Biche a tousjours peur,
Le Lyon de soymesme asseuré se hazarde.
La peur qui sert au peuple et de frein et de Loy,
Ne sçauroit estonner ny ta vertu ny toy :
La Loy ne sert de rien, quand la Vertu nous garde.
