Cette page n’a pas encore été corrigée
XXI
Amour, tu es trop fort, trop foible est ma Raison
Pour soustenir le camp d’un si rude adversaire.
Trop tost, sotte Raison, tu te laisses desfaire :
Dés le premier assaut on te meine en prison.
Je veux, pour secourir mon chef demi-grison,
Non la Philosophie ou les Loix : au contraire
Je veux ce deux-fois nay, ce Thebain, ce Bon père,
Lequel me servira d’une contrepoison
Il ne faut qu’un mortel un immortel assaille.
Mais si je prens un jour cest Indien pour moy,
Amour, tant sois tu fort, tu perdras la bataille,
Ayant ensemble un homme et un Dieu contre toy.
La Raison contre Amour ne peut chose qui vaille :
Il faut contre un grand Prince opposer un grand Roy.
