Cette page n’a pas encore été corrigée
IV
Tandis que vous dancez et ballez à vostre aise.
Et masquez vostre face ainsi que vostre cœur,
Passionné d’amour, je me plains en langueur,
Ore froid comme neige, ore chaud comme braise.
Le Carnaval vous plaist : je n’ay rien qui me plaise
Sinon de souspirer contre vostre rigueur.
Vous appeller ingrate, et blasmer la longueur
Du temps que je vous sers sans que mon mal s’appaise.
Maistresse, croyez moy je ne fais que pleurer,
Lamenter souspirer et me désespérer :
Je désire la mort et rien ne me console.
Si mon front si mes yeux ne vous en sont tesmoins.
Ma plainte vous en serve, et permettez au moins
Qu’aussi bien que le cœur je perde la parole.
