Aus autres des ailes ordonne.
Mais a vous ſeuls donne des pieds,
Et des ailerons deſplies
Pour voler par le ciel grand erre,
Et pour marcher deſſus la terre.
Que dirai plus vous auiſés
Les vens que vous profetiſés
Plus d’un jour deuant leur venue :
La Nature vous eſt connüe,
Et toutes les ſaiſons des cieus :
Bref, vous estes de petis dieus.
Or gentits Fourmys ie vous prie,
Si un jour Belleau tient ſamie
A l’ombre de quelque Fouteau,
Sous qui ſera vostre troupeau,
Ne piqués point la chair douillette
De ſa gentille mignonnette.
Le Papillon de Remy Belleau
a P.de Ronſard.
O que i’éstime ta naiſſance
Pour de rien n’auoir congnoiſſance,
Gentil Papillon tremblotant,
Papillon touſiours voletant,
Griuolé de cent mille ſortes,
En cent mile habis que tu portes,
Au petit mufle éléphantin,
Ioüet d’enfans, tout enfantin :
