L’un deça, & l’autre dela.
Car l’un renuerſé s’en alla
Deſſous Aethne, & l’autre eut l’eschine
Sous le mont ſouffreux d’Enarine.
Or ſi quelcun doit receuoir
Quelque ſalaire pour auoir
D’un autre chanté la louange
Octroye moy pour contre échange
De mes verds, un present nouueau
Aus premiers mois du renouueau :
C’est que ta vois un petit rude,
N’aproche iamais de l’estude,
Ni du lit de mon cher Beleau.
Ainſi, Grenouille, ainſi dans l’eau
Le Heron becu ne te gripe,
Et le brochet dedans ſa tripe
Iamais ne te puiſſe enfoüir ,
Et touſiours puißes tu fuyr.
La piece rouge, hameçonnée,
Et iamais le ſale Hymenée
Du crapaut de venin couuert,
Ne puiſſe ſouiller ton dôs vert.
Le Freſlon a Remy Belleau.
Qui ne te chanteroit, Frélon !
De qui le piquant aiguillon
Releua l’aſne de Silene,
Quand les Indois parmi la pleine
