Epitafe de Iaques Mernable, ioüeur de Farces .
Tandis que tu viuois, Mernable
Tu n’auois ni maiſon, ne table,
Et iamais, pauure tu n’as veu
En ta maiſon le pot au feu.
Ores la mort t’est proufitable,
Car tu n’as plus beſoing de table,
Ni de pot, & ſi deſormais
Tu as maison pour tout iamais.
Prosopopée de Louis de Ronſard ſon pere.
Vous qui ſans foi errés a l’auenture,
Vous qui tenés la ſecte d’Epicure
Amandés vous, pour Dieu ne croyés pas
Que l’ame meure auecques le trespas.
La nuit hastoit la moitié de ſa courſe,
Et mi-courbé le gardien de l’Ourſe
Viroit son char d'vn aßés petit tour,
Au rond du Pole, en attendant le iour,
Quand i’aperceu ſur mon lit vne image
Greſle, ſans ôs, qui l’œil, & le viſage,
Le cors, la taille, & la parole auoit
De feu mon pere a l’heure qu’il viuoit :
En me pouſſant, trois fois elle me touche,
La retouchant, s’en vola de ma couche
