Page:Ronsard - Le Bocage, 1554.djvu/35

Pa. Außi fit il long tans, car durant ſa ieuneſſe
Que ſes dois remüoyent d’une agile ſoupleſſe,
Et qu’il touchoit le Luc plus viſte & mieus a point,
Touiours elle estoit mole, & ne roidiſſoit point,
Mais quãd il deuint vieil, & que ſa main peſante
S’engourdit ſur le Luc a demi languiſſante,
La pierre d’un couſté dure à ſes chans estoit,
Et de l’autre couſté touiours mole restoit,
Comme on voit le coural deſſous la mer s’eſpendre
Endurci d’un couſté de l’autre couſté tendre.
Cerbere a ſon passer tint ſes gouſiers fermés,
Et les Manes des mors par l’oreille charmés
Oublioient leurs trauaus, Titye ſur la pleine
Aus vautours estendu, en oublia ſa peine,
Flegyas l’oublia, Siſyfe ne ſentoit
Le vain labeur du roc, la roüe s’abſentoit
Des membres d’Ixion, & les Sœurs Beleides
Ce jour là tout entier n’eurēt leurs cruches vuides,
Et Tantale au meillieu de ſon troiſieme ennui
D’un gouſier mal iouieus rit en despit de lui,
Et les horribles sœurs beantes, s’edreſſerent,
Et tomber à leurs piés leurs grans torches laisserēt.
Mais quel proufit nous eſſe, & puis que ceus d’abas,
En ont tout plaisir, & nous ne l’auons pas?
Or toi quiconque ſois, iette lui mile branches
De Laurier ſur ſa tombe, & mile roſes franches,
Et le laiſſe dormir, & penſe qu’auiourdui,
Ou peut eſtre demain, tu ſeras comme lui.