Page:Ronsard - Le Bocage, 1554.djvu/21

Et qui nous a de ſon ventre fait naiſtre
Tant de vainqueurs de laurier couronnés,
Et tant d’eſprits aux Muses adonnés.
C’est celle la qui a produit icy,
Roland, Renaud, & Charlemaigne außi
Lautrec Baiard Trimouille & la Palice
Et toi Henri, fleau de la malice,
Roi dont l’honneur ſus les autres reluit,
Ainsi que l’astre a Venus, qui la nuit
De ſon beau front tous les autres efface,
Lors qu’il a bien laué ſa belle face
Dans l’Ocean: maint flambeau qui eclaire,
Sort de ses yeus: la nuit en eſt plus claire.
Roi qui doit ſeul par le fer de la lance,
Rendre l’Espagne eſclaue de ſa France,
Et qui naguere a l'Anglois abbatu,
Le premier prix de ſa ieune vertu.
Ie te ſalue, ô terre plantureuſe,
Heureuſe en peuple, & en Princes heureuſe.
Moi ton Poëte, aiant premier oſé
Auoir ton los en rime compoſé,
Ie te suppli, qu’a gré te ſoit ma lyre:
Et ſi quelcun enrage d’en médire,
Soit il priſé du pauure populaire,
Et ſes labeurs ne puissent iamais plaire
A mon prelat, l'honneur de ta prouince,
Ny aus saints yeus de mon grand Roi, ton Prince.