Fleſchir l’enfer, mouuoir les mons de Thrace,
Et retenir le feu qu’il ne ſaccage
Les verds cheueus d’vn violé bocage
Quand Iupiter menace de ſon ire
Les haults ſourcils des montaignes d’Epire :
Et que son traict iustement depité
Rompt le ſommet d’une iniuſte cité.
Le Grec vanteur la Grece vantera,
Et l’Espaignol l’Espaigne chantera,
L’Italien les Itales fertiles,
Mais moi François, la France aus belles villes :
Et ſon renom, dont le crieur nous ſommes,
Ferons voler par les bouches des hommes :
Ou l’equité & la iustice außi,
Gemelles ſeurs, y fleurissent ainſi
Que deus beaus lis ou deux roſes, alors
Que le printemps pouſſe les fleurs dehors.
Il ne fault point que l’Arabie heureuſe,
Ne par ſon Nil l'Aegypte plantureuſe,
Ne l’Inde riche en mercerie estrange,
Face à la tienne egale ſa louange
Qui d’un clin d’œil un monde peus armer,
Qui as les bras ſi longs deſſus la mer,
Qui tiens sur toy tant de ports & de villes,
Et ou les loix diuines & ciuiles,
En long repos tes citoyens nourriſſent.
On ne voit point par les champs qui fleuriſſent,
Errer ensemble vn tel nombre d’abeilles,
Baiſans les lis & les roses vermeilles :
Ne par l’Esté ne marchent au labeur
