frere, prince amateur de la poësie : de laquelle ce premier ouvrier finalement est decedé sous vostre regne, apres l’avoir honoré douze ans entiers sous vostre protection et faveur. C’est pourquoy, dy-je, apres avoir rendu au moins mal qu’il m’a esté possible, à ce grand personnage, le juste et dernier office deu à nos amis defuncts, j’ay pensé que ne ferions chose hors de propos, m’ayant esté par luy recommandée l’impression de ses œuvres, et par vostre privilege, permise, et commandée, de les mettre en lumiere sous vostre nom, afin qu’un si grand roy, comme vous estes, honorast de la marque de son nom et regne la fin d’un si grand personnage comme est le poëte Ronsard : et que ses Œuvres poëtiques pareillement honorassent et recommandassent la memoire et le nom d’un roi si rare comme vous estes, mis au front d’une si rare poësie. Laquelle offrant à vostre Majesté, je la supplie recevoir aussi favorablement le présent, comme devotement il vous est presenté :
Sire, je prie Dieu, le Roy des Roys, vous conserver en toute prosperité, tres-glorieux et tres-victorieux par dessus vos ennemis, bien obey et bien respecté de vos affectionnez subjects : entre lesquels, comme l’un des moindres d’iceux, je me dedie et consacre aux piedz de vostre Majesté.
Vostre très humble et très affectionné subject,
