De la nature un cœur je n’ay receu,
Ainçois plustost pour se nourrir en feu
En lieu de luy j’ay une Salamandre :
Mon corps n’est point ny de terre ny d’eau,
Ny d’air leger : il est fait d’un flambeau,
Qui se consume, et n’est jamais en cendre.
BELLEAU
J’ay pour maistresse.) Le Poëte dit" que sa maistresse est un monstre composé d’une Gorgonne, de la beauté d’un Ange, de la fierté de Mars, et de la chasteté de Latonne. Il dit apres, que la nature en lieu d’un cœur luy a donné une Salamandre, laquelle passe, tant elle est froide, par le feu sans mourir, et que s’il eust un cœur de chair comme les autres, long temps y a qu’il fust consumé du feu d’amour. Salamandre est une petite beste à quatre pieds, qui ressemble un Lezard extreme ment froid. Voyez Nicandre.
XXXVI
Si tost qu’entre les bois tu as bèu la rosée,
Soit de nuict, soit de jour logé dans un buisson,
Des ailes tremoussant tu dis une chanson
D’une note rustique à plaisir composée.
Au contraire de toy j’ay la voix disposée
A chanter en ce bois, mais en autre façon.
Car tousjours en pleurant je desgoise mon son :
Aussi j’ay tousjours l’ame en larmes arrousée.
Je te gaigne à chanter : ta voix est de trois mois.
L’an entier est tesmoin des plaintes de ma voix,
Navré d’une beauté qui me tient en servage.
