J’ay cent fois la fuitive à l’hostel r’appellée,
Qu’Amour me desbauchoit : ores elle escoutoit,
Et ores sans m’ouyr le frein elle emportoit,
Comme un jeune Poulain qui court à la vollée.
La tançant, je disois, Tu te vas decevant.
Si elle nous aimoit, nous aurions plus souvent
Course, poste, message, et lettre accoustumée.
Elle a de noz chansons, et non de nous soucy.
Mon ame, sois plus fine : il nous faut tout ainsi
Qu’elle nous paist de vent, la paistre de fumée.
XXVIII
Aller en marchandises aux Indes precieuses,
Sans acheter ny or ny parfum ny joyaux :
Hanter, sans avoir soif, les sources et les eaux :
Frequenter sans bouquets les fleurs delicieuses,
Courtiser et chercher les Dames amoureuses,
Estre tousjours assise au milieu des plus beaux,
Et ne sentir d’Amour ny fleches ny flambeaux,
Ma Dame, croyez moy, sont choses monstrueuses.
C’est se tromper soymesme : aussi tousjours j’ay creu
Qu’on pouvoit s’eschaufer en s’approchant du feu,
Et qu’en prenant la glace et la neige on se gelle.
Puis il est impossible, estant si jeune et belle,
Que vostre cœur gentil d’Amour ne soit esmeu,
Sinon d’un grand brasier, au moins d’une estincelle.
XXIX
Comme je regardois ces yeux (mais ceste fouldre)
Dont l’esclat amoureux ne part jamais en vain,
